點樣揀岩自己嘅維他命精華？唔同維他命精華又對肌膚有咩好處？

維他命對於肌膚嘅護理非常重要，而唔同嘅維他命更加會對肌膚有唔同嘅好處。今日我哋就嚟講下五種主要嘅維他命：維他命A、B3、B5、C同E對肌膚嘅功效！

維他命A

維他命A係一種強效抗氧化物，佢可以減少細胞氧化、有效抗衰老、深入皮膚底層，刺激皮膚細胞增生同埋促進膠原蛋白合成，令肌膚更加健康有光澤。維他命A仲有個重要嘅功效，就係可以緊實皮膚同改善皺紋，適合想改善膚質嘅朋友💛

而護膚品中常見嘅維他命A成分就包括有維他命A醇同維他命A酯，佢地都係維他命A酸嘅衍生物，功效同維他命A酸相似，但係對皮膚更加溫和同低刺激性，適合日常使用。

常見維他命A種類	維他命A酸 Retinoic acid	維他命A醇 Retinol	維他命A酯 Vitamin A Palmitate
功效	有效抗痘治療粉刺	控制發炎改善毛孔粗大改善暗瘡老化肌	活化細胞增厚表皮改善肌膚彈性
溫和度	★	★★	★★★
肌膚適用濃度	/ (屬於處方藥物）	≤ 2%	≤ 2%

維他命B3

維他命B3可以調節皮膚細胞嘅新陳代謝，拉緊細胞之間嘅密度，加速肌膚入面細胞嘅更新同修復，從而修復返損害左嘅角質層，仲有改善肌膚角質層健康，令肌膚更加健康同有光澤。另外，係收緊角質層嘅同時，佢仲可以幫助控油鎖水，減少面上油光同痘痘問題。

而護膚品中經常出現嘅維他命B3就包括有煙酰胺，佢屬於維他命B3其中一種衍生物，可以有效鎖水同減少肌膚皮脂增生。

常見維他命B3種類	煙酰胺 Nicotinamide
功效	修補皮膚結構層鎖緊肌膚水分減少皮脂增生
肌膚適用濃度	≥ 2.5%

維他命B5

維他命B5係一種保濕物質，常見嘅維他命B5就包括有泛酸同泛醇（泛酸前驅物）。佢地可以穿透肌膚表層，到達表皮深層，幫肌膚深層補水，令肌膚更加有彈性。佢仲可以幫助肌膚修復，令肌膚更加健康。

常見維他命B5種類	泛酸 Pantothenic acid	泛醇 Panthenol
功效	肌底補水修復皮膚屏障	防止水分流失降低肌膚刺激促進膠原蛋白增生
肌膚適用濃度	≥ 5%	≥ 5%

維他命C

維他命C係一種強效抗氧化物，可以減少細胞氧化，同有效抗衰老。佢可以促進皮膚細胞嘅新陳代謝，減少黑色素沉澱，令到膚色更加明亮。另外，維他命C仲可以促進膠原蛋白生成，增強肌膚彈性，同埋減少皺紋。

維他命C其實有好多形式，而常見嘅種類包括抗壞血酸，乙基維他命C，維他命C磷酸鈉鹽，抗壞血酸葡萄糖胺等等。雖然佢地都係維他命C，佢地嘅穩定性同功效都有分別，選購維他命C精華果陣，不妨留意下入面包含嘅維他命C種類💛

常見維他命C種類	抗壞血酸 Ascorbic acid	乙基維他命C Ethyl Ascorbic Acid	維他命C磷酸鈉鹽 Sodium Ascorbyl Phosphate	抗壞血酸葡萄糖胺 Ascorbyl glucosamine
功效	美白肌膚有效抗氧化	增加肌膚彈性減退痘印和面上斑點	抗氧化改善痘痘抑制自由基活性	抗自由基抑制黑色素刺激膠原蛋白增生
穩定性	★	★★★	★★★	★★★
肌膚適用濃度	/（少用於護膚品中）	≥ 15%	≥ 15%	≥ 15%

維他命E

維他命E亦都係一種抗氧化物，可以減少細胞氧化同有效抗衰老。佢可以深層滋潤肌膚，令肌膚更加有彈性同增加肌膚光澤。此外，維他命E仲可以減少紫外線嘅傷害，減少色斑生成。

常見係護膚品入面嘅維他命E就包括左生育酚同埋生育三烯酚，佢地都可以幫助肌膚抗氧化。紫外線容易傷害皮膚，想保護肌膚免受紫外線引起嘅傷害，可以用含有生育酚或者生育三烯酚嘅護膚產品保護肌膚。